Sveitarfélagið Hornafjörður hefur sett sér og stofnunum sínum eldvarnastefnu sem miðar að því að auka skilning og öryggi starfsmanna, skjólstæðinga og viðskiptavina með það að leiðarljósi að draga úr líkum á tjóni á rekstri og eignum og viðhalda fjárfestingu sem liggur í eldvarnabúnaði. Stefnan er sett að fyrirmynd Eldvarnabandalagsins og er liður í samstarfi aðila um að auka eldvarnir hjá Sveitarfélaginu Hornafirði. Stefnan felur meðal annars í sér að viðhalda eldvörnum og reglubundnu eldvarnaeftirliti eldvarnafulltrúa hverrar stofnunar fyrir sig þar sem hver forstöðumaður tilnefnir sinn fulltrúa og einn til vara.
Framkvæmd eldvarnastefnu er á ábyrgð forstöðumanns hverrar stofnunar fyrir sig. Kynna skal eldvarnastefnu fyrir starfsfólki og brýna fyrir því ábyrgð alls starfsfólks á eftirliti með eldvörnum.
Samkvæmt eldvarnastefnu Sveitarfélagsins Hornafjarðar felst eftirlit og eftirfylgni í eftirfarandi:
- Að fela eldvarnafulltrúa/eldvarnafulltrúum að framkvæma mánaðarlegt og árlegt eldvarnaeftirlit samkvæmt gátlistum og gera úrbætur í samræmi við ábendingar, sbr. reglugerð nr. 723/2017 um eldvarnir og eldvarnaeftirlit.
- Að greina og draga úr eldhættu í samvinnu við starfsmenn og eftir atvikum utanaðkomandi ráðgjafa.
- Að innleiða verklagsreglur Eldvarnabandalagsins um logavinnu. Logavinna fer ekki fram í húsnæði stofnunar nema samkvæmt logaleyfi sem byggir á verklagsreglum.
- Að veita starfsfólki fræðslu um grunnatriði eldvarna og brýna fyrir því að lagfæra það sem aflaga fer eða láta næsta yfirmann vita af hugsanlegum ágöllum.
- Að hafa ávallt í gildi rýmingaráætlun, uppfæra hana eftir þörfum og æfa reglulega eða eigi sjaldnar en árlega.